• Gikan sa pagpanaha ngadto sa EPI ug pagbuswak, mag-abono ug nitroheno (1.5 ka sako nga urea kada ektarya sa panahon sa ting-init o 1.0 ka sako nga Urea kada ektarya sa ting-ulan) kon ang pagbasa sa LCC ubos sa 4 sa binalhin nga humay ug ubos sa 3 usab sa direktang sabod sa humay sa basakan.
• Binalhin nga humay ug direktang pagsabod sa humay. Sa pagpamuswak, kinahanglan labing menos makaabot sa 300 nga uhay kada metro kwadrado para sa binalhin nga humay, ug 350 ka uhay kada metro kwadrado para sa direktang sabod nga humay.
• Aron mahibaw-an ang kadaghanon sa uhay, himua ang panalagmang pagpili ug 3 ka sampling sites sa pinababag nga linya tabok sa pilapil o luwang. Kinahanghan nga kini nga mga sampling sites may distansiya nga 1 ka metro gikan sa daplin sa pilapil. Ihapon ang kadaghanon sa uhay pinaagi sa paggamit sa 1m x 1m kwadrant (1 m2). Isumada ang tanan nga uhay ug bahinon sa makatulo aron makuha ang kasagaran nga gidaghanon sa uhay sa matag metro kwadrado.

Hibaloi ug manihoa ang gikinahanglan nga nitroheno sa inyong tanum base sa LCC ug susiha ang uban pang sustansiya base sa Minus One Element Technique o Nutrient Omission Plot (NOP).

Ang insaktong pag-areglar o pagmaneho sa sustansiya makapauswag sa pagtubo sa ani sa humay. Buot ipasabot, paghatag sa sakto nga klase ug kadaghanon sa sustansiya sa insaktong panahon.

Ang inabonohan nga humay dali motubo kon taas ang sidlak sa adlaw.

Himoon ang pagduki-duki sa Minus One Element 30 ka adlaw sa dili pa magtanum sa binalhin nga humay o sa direktang sinabod sa basakan ug susiha ang estado sa sustansiya base sa nakita nga mga sintomas sa kakulangon sa sustansiya sa tanum ug sa pagtubo usab niini (katas-on ug pagpanipak sa tanum) pero dili ang biomass.

Gamita ang LCC kada 7 ka adlaw gikan sa sayo nga pagpanipak/pagpanaha ngadto sa sayo nga pagpamuswak aron masusi ang kinhanglanon nga nitroheno (N) nga abono. Ang LCC ug MOET mao ang simpleng pamaagi aron atong masusi ang kakulangon sa sustansiya, giya sa pagbutang sa abono, ug aron makamenos sa gastos sa paggamit sa abono.

Gawas sa kakulangon sa sustansiya, gikinahanglan usab nga ikonsiderar ang sobrang mineral o mineral toxicity sa pagdesisyon kon unsa nga mga sustansiya ang angay ibutang. Ang iron toxicity kasagaran makita sa mga basakan nga kanunay mabahaan sa panahon sa pagtubo sa humay. Ang humay nga apektado sa iron toxicity adunay gagmay nga brown spots nga makita sa ubos sa dahon nga nagagikan sa tumoy o orange yellow ngadto sa brown nga dahon.

Sa pagmaneho sa iron toxicity gikinahanglan ang pagsulod-gawas sa tubig (intermittent irrigation). Likayan usab nga kanunay may tubig ang basakan labi na sa yuta nga lisod muhunob ang tubig, balanse nga pag-abono ug gikinahanglan usab ang pagdaro sa uga nga yuta human sa pag-ani aron mapataas ang iron oxidation sa panahon nga bakante ang yuta (fallow period).